PN-BESI-TL ho Membru GFFTL Halo Audiensia ho Prezidente Komisaun Ezekutivu-BTL.EP
Dili, 29 Maiu 2024 Plataforma Nasionál Bee, Saneamentu no Ijiene Timor-Leste (PN-BESI-TL) no Grupu Feto Foinsa’e Timor-Leste (GFFTL) hala’o Audiénsia ho Prezidente Komisaun Ezekutiva Bee Timor-Leste, Empreza Públika (BTL.EP), iha Sala Enkontru BTL.EP, Caicoli, Dili. Objetivu husi Audiénsia ida ne’e mak atu fahe informasaun no halo diskusaun kona-ba bee no saneamentu, iha tempu hanesan, PN-BESI-TL mós husu BTL.EP nia apoiu ba ekipa PN-BESI-TL ne’ebé sei ba hala’o atividade Auditória Sosiál iha Munisípiu Viqueque no Covalima.
Koordenadór PN-BESI-TL iha nia introdusaun atualiza informasaun no deskobrimentu balun ligadu ho sistema bee iha área rurál ne’ebé hala’o liu husi Auditoria Sosiál iha Postu Tilomar, Munisípiu Covalima. Nune’e mós atualiza servisu kontinuasaun PN-BESI-TL nian liu-liu kona-ba Auditoria Sosiál liu husi Kartaun Pontuasaun Komunidade (KPK) ne’ebe sei hala’o iha Munisípiu Viqueque, Postu Administrativu Ossu no Munisípiu Covalima, Postu Administrativu Fohorem, iha ne’ebé atividade ida ne’e hetan apoiu husi Gabinete Apoio Sosiedade Civil (GASC-V.PM).
Iha fatin hanesan, Vise-Prezidente BTL.EP apresia tebes ho servisu PN-BESI-TL nian ne’ebé hanesan parseiru governu hodi apoiu ba dezenvolvimentu setór Bee iha Timor-Leste. Nia mós hatutan, BTL.EP hare hela relatóriu husi PN-BESI-TL hodi halo intervensaun ba parte balun no balun sei entrega ba munisípiu. Nia mós rekomenda ba PN-BESI-TL atu hato’o mós informasaun ba parte Eskola no Sentru Saúde sira atu rezerva bee iha tanke ba sira-nia nesesidade urjente.
Enkuantu, Prezidente BTL.EP mós husu ba PN-BESI-TL atu kontinua halo advokásia ba komunidade sira liu husi konsensializasaun no edukasaun sívika kona-ba Jestaun ba Basia Idrografia liu-liu iha mota-ulun sira (Upstream) no Proteje ambiente sira liu husi labele tesi ai no sunu rai arbiru. Aleinde ne’e, Prezidente BTL.EP ne’e mós husu ba PN-BESI-TL atu rekolla dadus no informasaun kona-ba Sistema Bee iha área rurál liu-liu iha Fasilidade Públiku sira hanesan Eskola no Sentru Saúde.
Partisipa iha Audiénsia ne’e mak Prezidente Komisaun Ezekutiva BTL.EP, Vise-Prezidente BTL.EP no Koordenadór Sekretariadu PN-BESI-TL ho nia ekipa.
